F1 por caba e temporada 2026 na Imola si Qatar y Abu Dhabi no por sigui

ORANJESTAD — Formula 1 ainda no sa si e ultimo dos Grand Prix di temporada 2026, programa pa 29 di november na Qatar y 6 di december na Abu Dhabi, por sigui manera planea debi  na e situacion di seguridad den Medio Oriente. Imola na Italia ta wordo considera como un posible alternativa si e dos caredanan no por tuma lugar.

E conflicto den region ya a obliga Formula 1 pa cambia su calendario. E Grand Prix di Bahrein, cu originalmente mester a tuma lugar den e region, a wordo traslada pa Malaysia pa motibonan di seguridad.

Formula One Management y federacion FIA ainda no a tuma un decision final tocante Qatar y Abu Dhabi. Segun Haas-team principal Ayao Komatsu, expectativa ta cu Formula 1 lo duna mas claridad pa mitar di oktober.

Imola, cu no ta forma parti di calendario regular di F1 e aña aki, ta un di e opcionnan pa termina temporada. Sinembargo, un careda na Italia na final di november of december ta trece retonan, entre otro tempo friu, posibilidad di yobida fuerte y problemanan logistico pa e teamnan.

E incertidumbre ta afecta Formula 2 tambe. Den e categoria ey, si e caredanan di Qatar y Abu Dhabi no sigui, no tin plan pa un careda alternativo. Esaki ta nifica cu e campeonato por termina sin mas careda, mientras Rafael Câmara, Nikola Tsolov y Alex Dunne ainda ta den pelea pae  titulo.

Pa awor, Formula 1 ta spera cu e caredanan na Qatar y Abu Dhabi por sigui, pero Imola ta keda prepara como un posible solucion si e situacion di seguridad no permiti e temporada termina den Medio Oriente.