Segun CBS, inflacion na Aruba a subi 2.7% den un aña; prijsnan bolbe subi na augustus

ORANJESTAD — Costo di bida na Aruba a bolbe subi durante augustus 2026. Segun e Indice di Prijs di Consumo (CPI) di Oficina Central di Estadistica (CBS), prijsnan a aumenta 0.5% compara cu juli, mientras inflacion anual a yega 2.7% compara cu augustus 2025.      

Ocho di e 12 sectornan midi door di CBS a registra aumento di prijs durante augustus. Transporte tabata e sector cu mayor impacto, cu un subida di 3.4% den solamente un luna. Restante bienes y servicio a subi 1.0%, mientras vivienda a aumenta 0.3%.      

E aumento den transporte tabata relaciona principalmente cu gasto pa uso di vehiculo personal, incluyendo e fuerte subida den prijs di combustible.

Di otro banda, comunicacion a registra un caida di 1.8%, principalmente debi na prijs mas abou di ekipo di telefon.      

CBS ta indica ademas cu inflacion promedio anual a subi na 1.0%, compara cu 0.4% den e periodo corespondiente anterior.