Gobierno ta instala Task Force pa busca solucion structural pa desperdicio

ORANJESTAD — Minister di Husticia, Integridad, Transporte Publico y Energia, Arthur Dowers, a instala un Task Force oficialmente pa atende e problema di desperdicio na Aruba.

E grupo, activo desde 1 di september, tin como encargo pa prepara proposicionnan concreto pa un maneho di desperdicio mas duradero, coordina y responsabel.

Entre e prioridadnan ta prevencion y control di tiramento ilegal di desperdicio, limpiesa, reciclahe, procesamento di desperdicio organico, coleccion di data y busca un sistema financiero duradero pa maneho di desperdicio.

E Task Force lo evalua tambe si leynan existente mester wordo adapta of si tin necesidad pa legislacion nobo.

Representantenan di diferente ministerio, departamento y organisacion ta participa, entre nan Directie Natuur en Milieu, DOW, Bureau City Inspector, Serlimar, Utilities, AWSS, WEB Aruba N.V. y DEHZI.

E meta final ta trece Gobierno proposicionnan concreto pa pasa di un maneho fragmenta na un sistema mas structural y coordina.