Hues a para construcion di Taco Bell pa falta di permiso

ORANJESTAD — Construccion di e Taco Bell nobo cu drive-thru na Aruba mester para temporalmente. Corte di Prome Instancia a suspende dos permiso di construccion despues cu a conclui cu tin falta serio den e procedura y evaluacion di e projecto.

Shete habitante cu ta biba den e becindario a presenta obhecion contra e construccion.

Segun Corte, e edificio planea ta pasa e haltura maximo permiti di 4,5 meter bou di ROPv. Ademas, Gobierno no a investiga suficientemente si un restaurant  cu drive-thru por causa molester pa casnan den becindario, incluyendo zonido, holo, luz y mas trafico.

Corte a constata tambe cu Polis y Welstandscommissie mester duna un conseho nobo. Polis a evalua un version anterior di e projecto, prome cu e entrada y salida a wordo cambia pa un otro caminda. E conseho positivo di Welstandscommissie tampoco tabata suficientemente motiva.

Tin un otro problema cu e permiso modifica: bou di e Bouw- en sloopverordening nobo, director di DOW mester tuma e decision, pero e permiso a wordo duna door di minister. Segun Corte, e minister no tabatin e competencia pa haci esaki.

MIKA N.V. a argumenta cu e kier habri e Taco Bell dia 15 di december y cu atraso por pone e franchise na riesgo. Pero huez a determina cu e compania a cuminsa construccion sabiendo cu tabatin obhecionnan y, pues, a asumi e riesgo.

E dos permisonan ta keda suspendi mientras Gobierno mester reconsidera e asunto. Minister tin seis siman pa tuma un decision nobo riba e obhecion contra e permiso original.