Estudio: Gobierno tin demasiado influencia riba Parlamento di Aruba

ORANJESTAD — E sistema politico cu Aruba a hereda di Hulanda no ta ofrece suficiente contrapeso democratico, segun un estudio di diez cientifico publica den Small States & Territories. E investigadornan ta señala cu Gobierno tin demasiado influencia riba Parlamento, e presidente di Parlamento no ta suficientemente independiente y e sistema electoral ta laga un parti considerable di votadonan sin representacion. Esaki segun e portal aruba.nu. 

Segun e estudio, politiconan cu mas voto generalmente ta bira minister, mientras candidatonan cu menos voto ta ocupa nan puesto den Parlamento. Esaki ta duna minis tronan mas peso politico cu e parlamentario nan cu mester controla nan, debilitando e control riba Gobierno.

E investigadornan ta cuestiona tambe cu Gobierno formalmente ta nombra e presidente di Parlamento, despues di un proposicion di Parlamento mes. Nan ta recomenda cu Parlamento por eligi y reemplaza su presidente independientemente.

E estudio ta destaca ademas cu, di ocho gobierno di coalicion desde Status Aparte na 1986, solamente un a completa su periodo. E cuater gobiernonan di un solo partido si a completa nan mandato.

E autornan ta propone reforma electoral, un corte constitucional y mas participacion di ciudadano. Nan conclusion ta cu Aruba mester adapta su institucionnan na e realidad di un comunidad chikito, unda relacionnan personal y dependencia di Gobierno tin gran influencia.