Vroegop: ‘HOH lo corta cuido prome cu no por paga trahadornan’

ORANJESTAD — Director di Horacio Oduber Hospital, Jacco Vroegop, a desmenti informacion publica awe mainta riba portada di e matutino Diario, sugiriendo cu si no bin accion financiero, hospital lo no tin placa pa paga salario di su trahadornan entrante november. “No, esey no ta corecto,” Vroegop a reacciona directamente na Noticiacla.

REDUCI CANTIDAD DI CUIDO 

Segun e director, no tin un menaza inmediato pa pago di salario. E problema ta cu si Hospital no haya suficiente fondo pa presta tur e cuido cu AZV ta cumpra cerca dje, HOH lo mester reduci e cantidad di cuido cu e por ofrece. “Nos lo para prome cu e cuido regular cu por wordo planea,” Vroegop a splica. E diferencia ta importante. Segun e director, e scenario no ta cu Hospital ta keda sin placa pa paga personal na november, sino cu e capacidad pa duna cuido por wordo reduci si financiamiento no ta cubri e costo real.

NO POR OFRECE E CUIDO 

“Si AZV no kier paga e cantidad correcto pa e cuido cu nan kier cumpra cerca nos, nos no por ofrece e cuido ey y nan lo mester cumpra esaki otro caminda,” Vroegop a bisa. E declaracion ta pone e discusion financiero di Hospital den un otro perspectiva: no salario, pero acceso na cuido ta e riesgo principal.

FALTA DI FONDO 

Noticiacla ya a publica cu, segun Vroegop, HOH no ta ricibi suficiente fondo pa mantene e nivel di cuido cu Aruba ta exigi. E director a indica anteriormente cu compensacion via AZV ta aumenta aproximadamente 2% pa aña, mientras inflacion, medicamento, material medico, carga y otro gastonan operacional a subi mucho mas. Awor Vroegop ta ripiti e punto. “Tin un solo saco di placa, y tur cos mester sali for di e saco ey. Si e saco no ta suficiente mas, nos por acepta esey y duna menos cuido, of mester agrega placa pa tur hende haya e cuido cu nan mester na tempo.” Segun Vroegop, AZV kier mantene un crecemiento di alrededor di 2% pa aña, mientras solamente inflacion ya por supera e porcentahe ey, sin conta aumento internacional den prijs di medicamento, material, carga y otro servicio. E director ta critica   e posicion ey fuertemente. “AZV kier haya lo mihor posible pagando casi nada, riba lomba di e poblacion cu a paga su prima debidamente,” Vroegop a declara.

GOBIERNO KIER ANALISIS INDEPENDIENTE

E discusion a yega entretanto na Gobierno. Minister encarga cu Salubridad, UO AZV y SZA/HOH a acorda pa laga haci un analisis financiero independiente pa determina cuanto fondo Hospital realmente mester y cua medida ta necesario pa garantisa continuidad di cuido. Gobierno a indica cu e analisis mester produci informacion verificabel y cu continuidad y calidad di cuido no por wordo perhudica mientras e evaluacion ta andando.

VROEGOP TA CUESTIONA NECESIDAD DI UN REVISION

Vroegop no tin problema cu un revision nobo, pero e ta cuestiona dicon e ta necesario. “Nos cifranan ta controla y audita pa un oficina di accountant independiente, Ernst & Young, aña tras aña, y nan ta transparente riba nos website. Si AZV y minister kier wak nan di nobo, naturalmente no tin problema. Pero ta un situacion straño cu aparentemente nan no ta tuma e cifranan controla pa EY — y cu esey, EY mes — suficientemente serio.” E situacion financiero ya ta tin consecuencia den capacidad di cuido. Informacion publica recientemente ta indica cu un sala di operacion y un sala di endoscopia a wordo manteni cera te november, mientras profesionalnan di salud a expresa preocupacion tocante e efecto di falta di fondo riba cuido di paciente. Pa Vroegop, e eleccion finalmente ta simpel: si e cantidad di placa disponible no aumenta cu costo real di cuido, Hospital lo no por sigui entrega e mesun cantidad di servicio. Pero e director ta cla riba un punto: salario di trahadornan no ta e menaza cu ta riba mesa actualmente. E peliger ta cu HOH lo mester limita mas cuido.