TUI ta aumenta vuelo Amsterdam-Aruba na tres pa siman desde april 2027

ORANJESTAD — TUI lo aumenta su frecuencia entre Amsterdam y Aruba di dos pa tres vuelo pa siman entrante april 2027.

Minister di Turismo, Transporte y Labor, Wendrick Cicilia, a confirma e expansion despues di un reunion cu Head of TUI Dutch Caribbean, Antoine Klein Hofmeijer.

Segun Cicilia, Aruba kier intensifica su esfuerzo den mercado Europeo despues cu e cantidad di bishitante for di Europa a baha den ultimo añanan. Gobierno ta planea destina mas fondo pa promove e mercado aki y diversifica e origen di bishitantenan.

E minister ta considera e bishitante Europeo importante pa e estrategia turistico di Aruba, particularmente pa turismo mas sostenibel y bishitantenan cu ta keda mas largo y contribui mas ampliamente na economia local.

Gobierno y TUI tambe a discuti otro oportunidad di colaboracion pa fortalece conectividad aereo y posiciona Aruba mihor den Europa.