Ban Studia y EducationUSA ta invita scolnan pa fortalece orientacion di hubentud

ORANJESTAD — Oficina di Ban Studia y EducationUSA a cuminsa e aña escolar nobo cu un enfoque riba orientacion, inspiracion y desaroyo di hubentud. Durante e prome simannan, e organisacionnan a tene presentacion na Educampus y na e seminario “Rumbo pa Mañan” di Wind Creek Aruba, unda alumnonan a haya informacion y estimulo pa pensa riba nan futuro, estudio y oportunidadnan profesional.

Segun minister di Enseñansa Gerlien Croes, e meta ta pa crea mas contacto directo cu hobennan y yuda nan reconoce nan propio potencial. Ban Studia y EducationUSA ta invita scolnan, organisacionnan y empresanan pa colabora den presentacionnan, workshopnan y otro actividad educativo durante e aña escolar.

E organisacionnan ta sostene cu inversion den hubentud no ta solamente prepara futuro profesionalnan, pero tambe yuda forma un generacion cu tin mas confianza, ambicion y conexion cu comunidad.