Gobierno y ABC a cuminsa negociacion despues di orden di huez

ORANJESTAD — Gobierno di Aruba y Aruba Birdlife Conservation (ABC) a tene   nan prome encuentro formal diabierna 11 di septembe,  despues cu Corte a duna Gobierno cinco siman pa busca un solucion den e conflicto rond di proteccion di naturalesa y e actividadnan di UTV y ATV na costa noord.

E reunion ta marca un cambio importante den un conflicto cu durante e ultimo simannan a escala cu protesta di tour operators, presion politico y un caso hudicial. Tour operators a yega hasta pa blokea rotonde Las Americas despues di un reunion cu Gobierno, mientras cu posteriormente otro grupo a protesta dilanti Bestuurskantoor exigi claridad tocante futuro di nan actividadnan.

ABC, di su banda, a mantene firme cu e no tabata dispuesto pa retira su caso. Ainda diamars 8 di september e organisacion a confirma directamente na Noticiacla: “Nos no ta cancela e caso.”

Un dia despues, Corte a pospone e caso pa cinco siman, pero cu un condicion importante: Gobierno mester sinta na mesa cu ABC dentro di un siman y haci un esfuerzo serio pa yega na un solucion cu ta tene cuenta cu proteccion di flora y fauna, interesnan di tour operators y interes general di Aruba. E caso ta programa pa continua 15 di october.

PROMÉ ENCUENTRO

Segun Gobierno, minister di Vivienda, Infrastructura, Servicio Interno y Telecomunicacion Rene Herdé a reuni cu ABC pa habri dialogo y identifica punto di acuerdo. Ambos partido a prefera tene e encuentro pafo di edificionan di Gobierno.

Gobierno ta sostene cu e meta mester ta un solucion cu por combina proteccion di naturalesa cu un forma responsable di actividad turistico y recreacion. Despues di e reunion, ambos banda lo analiza e puntonan internamente y sigui cu e negociacion.

Presidente di ABC, Greg Peterson, a confirma cu e reunion a cuminsa pa 2'or di atardi diabierna y a califica esaki como “un prome bon reunion”, pero a adverti cu ainda tin hopi trabou dilanti. ““Negociacionnan a cuminsa. Finalmente, naturalesa tin un asiento serio na mesa.”,” Peterson a declara. Segun e, ABC ta sigui e instruccionnan di juez. El a gradici minister Rene “Baba” Herdé pa e apertura pa dialogo.

E encuentro ta importante paso cu e huez mes a exigi: no solamente papia cu sector di UTV y ATV, pero pone tambien proteccion di naturalesa formalmente riba mesa. Gobierno ya a firma un protocolo cu diferente tour operators pa sigui negociacion tocante ruta, acceso limita, control, zonificacion y proteccion ambiental. Awor, cu ABC tambe ta formalmente inclui, e periodo di cinco siman mester demonstra si e tres interesnan — naturalesa, turismo y empleo — por realmente wordo uni den un solucion cu por evita cu Corte finalmente mester dicidi e conflicto.