Wyatt Ras: Analisis independiente mester determina falta di placa na HOH

ORANJESTAD — Gobierno, UO AZV y SZA/HOH a acorda pa laga realisa un analisis financiero independiente di Horacio Oduber Hospital, cu e meta di establece di forma obhetivo cuanto fondo hospital realmente mester y cua decisionnan ta necesario pa garantisa continuidad di cuido hospitalario.

E paso ta sigui despues cu SZA/HOH desde juli 2026 a presenta Gobierno cu su preocupacionnan tocante e situacion financiero di hospital. Den ultimo tempo, profesionalnan di salud, organisacionnan medico y sindicatonan tambe a expresa preocupacion riba e presion financiero y su posible efecto riba cuido.

Segun Gobierno, e investigacion independiente mester produci informacion verificabel tocante e posicion financiero di SZA/HOH. E resultado lo sirbi como base pa Gobierno, AZV y hospital determina e necesidadnan financiero y tuma decisionnan necesario.

Minister encarga cu Salubridad ta enfatisa cu cuido di paciente no por wordo perhudica durante e proceso. Gobierno ta indica cu continuidad y calidad di cuido hospitalario mester keda garantisa mientras e situacion financiero ta wordo evalua.