Afirmacion di minister no ta cuadra: Sint Aloysius sí a wordo renoba

ORANJESTAD — E afirmacion di Minister di Enseñansa Gerlien Croes cu “niun scol a wordo renoba desde 2016”, manera cu e la declara e siman aki riba su pagina di Facebook, ta resulta di no ta cuadra cu e informacion publico disponible. Noticiacla a publica su comentario y biniendo di e minister, a tuma esaki na su balor pa loke e tabata,biniendo di e minister. Mas investigacion despues ta mustra sinembargo cu documentacion y publicacionnan for di 2022 y 2023 ta confirma cu Sint Aloysius School na Noord a pasa door di un renovacion amplio durante Gobierno Wever-Croes.

OVERZICHT

E asunto a surgi despues cu Croes a publica un overzicht cu e gastonan estima pa atende 43 scol na Aruba. Segun e minister, e situacion ta resultado di añanan sin renovacion suficiente. Den su publicacion e la critica e gobernantenan anterior y a declara cu desde 2016 niun scol a wordo renoba of construi. Despues di publicacion di e noticia riba NoticiaCla, por lo menos un parlamentario di MEP a contra aresta e declaracion di e minister aki, indicando cu siguransa cu e informacion no ta completamente corecto. 

INVESTIGACION TA DUNA OPOSICION RAZON RIBA E PUNTO AKI

Un investigacion di NoticiaCla den e registro publico despues, ta confirma cu Sint Aloysius School efectivamente a wordo renoba despues di 2016. Mas aleu a sali na cla cu na april 2022, durante un conferencia di prensa di Gobierno, e anterior Minister di Enseñansa di e tempo ey, Endy Croes a presenta e proyecto di renovacion. E trabou tabata inclui renovacion di hala noord y hala zuid, biblioteca, oficina y gimnasio, cu un inversion anuncia di aproximadamente Afl. 2 miyon. Na juli 2023, un comunicado di e ministerio a informa cu 12 klas a wordo renoba, hunto cu dak, plafond y tegels di e edificio banda pa noord. Tambe a construi oficina, koffie kamer, biblioteca y gymzaal nobo. Dos baño a wordo realoca y completamente traha di nobo. Na augustus 2023, DOW a inicia cu e ultimo fase: renovacion di speelplaats, solucion pa e problema di awa, nivelacion di terreno y asfalt nobo. Despues di esey, scol a muda bek den su edificio na Noord. Gobierno anterior mes a describi e edificio como “completamente renoba”. Esaki kier men cu e afirmacion literal cu “niun scol a wordo renoba desde 2016” ta incorrecto. Sint Aloysius School ta un contra-ehempel claro y documenta.

RENOVACION NO TA MES COS CU CONSTRUCCION NOBO

Por haci un distincion entre renoba un edificio existente y construi un scol completamente nobo. Sint Aloysius no a wordo construi for di cero: gran parti di e edificio existente a wordo rehabilita y adapta. Pero Croes no a declara solamente cu no a construi scol nobo. E la bisa cu niun scol a wordo “renoba”. Precisamente riba e punto ey, e registro publico ta contradici su declaracion.

ATRASO GRANDI TA KEDA UN REALIDAD

E hecho cu Sint Aloysius a wordo renoba no ta nifica cu oposicion a elimina e problema general. E overzicht presenta door di Croes ta mustra necesidadnan grandi na 43 scol y ta confirma cu Aruba tin un atraso serio den mantencion y renovacion di infrastructura escolar. Pero dos asunto mester keda separa: por tin un atraso grave den mantencion, sin cu esey haci e afirmacion cu “niun scol a wordo renoba desde 2016” berdad. Ademas, e overzicht publica ta contene un diferencia di Afl. 36 miyon. E cinco subtotalnan suma na Afl. 173,6 miyon, mientras e documento ta menciona un total general di Afl. 137,6 miyon. Ainda no tin un splicacion publico pa e diferencia aki. E aproximadamente Afl. 40 miyon cu, segun Croes, Aruba tin disponible anualmente pa tur inversion di pais, tambe ta un cifra menciona door di e minister, pero su publicacion no tabata inclui un desglose presupuestario pa verifica exactamente con e suma aki a wordo calcula.

CONCLUSION

E preocupacion di Minister Croes tocante estado di scolnan tin base: e necesidad financiero ta enorme y hopi edificio tin problema urgente. Pero su acusacion absoluto contra gobernantenan anterior a bay demasiado leu. E evidencia disponible ta mustra cu por lo menos Sint Aloysius School a wordo renoba ampliamente entre 2022 y 2023. Riba e punto specifico aki, reaccion di oposicion ta correcto y declaracion di Croes mester wordo rectifica of aclara.