Seroe Colorado: Residentenan ta bati alarma pa trafico peligroso; 120 auto den un ora

ORANJESTAD — UPDATE: Residentenan di Seroe Colorado ta bolbe bati alarma tocante nan calidad di bida, pero e biaha aki e preocupacion principal ta seguridad riba caminda. Segun representacion di Vereniging van Buurtbewoners di Seroe Colorado, un residente a conta 120 auto pasando den solamente un ora diamars mainta, entre 7:00 y 8:00, riba un caminda di santo recientemente crea den direccion di hotel Secrets. E residentenan ta bisa cu hopi di e autonan ta pasa cu velocidad halto, mientras e area practicamente no tin trottoir y habitantenan, turista y muchanan tin cu cana parcialmente riba caminda. E situacion ta un agravacion di e preocupacionnan cu residentenan ya a comparti cu Noticiacla na juni di e aña aki, ora nan a denuncia, entre otro, aumento di trafico relaciona cu hotel y construccion, vehiculo cu ta core duro, falta di trottoir sigur y e hecho cu Seroe Colorado tin solamente un caminda principal pa drenta y sali.

DOS CAMINDA DI SANTO, PERO PROBLEMA NOBER

Segun e asociacion di residentenan, den reunionnan anterior cu representantenan di DOW y DIP nan a logra cu, pendiente construccion di un caminda di asfalt, un caminda di santo wordo crea pa trafico relaciona cu hotel na construccion. Nan ta aclaria cu durante creacion di e caminda aki a corta hubada y hopi cadushi, y no manglar. Sinembargo, segun nan, e solucion cu mester a yuda controla trafico a trece un otro problema: velocidad. Un par di luna pasa, segun e residentenan, inspector di bario di San Nicolas a bishita management riba e sitio di construccion despues cu un habitante casi a wordo alcansa (gedal) door di trahadornan cu tabata core duro cerca di e pad pa Baby Beach. E acuerdo, segun residentenan, tabata cu e pad aki semper lo keda accesibel pa habitantenan di Seroe Colorado. Nan ta bisa cu despues di e keho, enbez di velocidad baha, algun conductor a cuminsa core mas duro.

120 AUTO ENTRE 7 Y 8 DI MAINTA

Desde siman pasa, segun e asociacion, un di dos caminda di santo a wordo crea desde 2nd Avenue, e caminda cu ta sali for di cercania di e kapel den direccion di hotel. Diamars mainta, un di e habitantenan a conta, segun e asociacion, 120 auto entre 7:00 y 8:00 di mainta. E preocupacion ta cu tambe riba e caminda aki residentenan frecuentemente tin cu cana riba of canto di caminda, pasobra no tin trottoir adecuado. “Nos no por cana sigur y hasta sali for di garage a bira peligroso,” ta e esencia di e keho nobo di residentenan.

POLIS: NO POR CONTROLA 24/7

Representacion di e residentenan a indica cu nan a tuma contacto cu Polis di San Nicolas pa pidi intervencion. Segun nan, e contesta tabata cu polis no por mantene control di trafico na e sitio 24 ora pa dia, siete dia pa siman. Nan a intenta tuma contacto tambe cu DOW, pero segun nan no a logra haya contesta telefonico. Residentenan ta cuestiona tambe si solamente coloca señalnan di trafico lo ta suficiente, mirando cu nan experiencia ta cu algun chauffeur aparentemente ta ignora hasta peticion directo pa baha velocidad. Segun nan, ora habitantenan haci seña na automobilistanan pa baha velocidad, tin caso caminda chauffeur juist ta acelera.

MUCHANAN Y TURISTA TAMBE DEN RIESGO

E tema no ta afecta solamente residentenan permanente. Seroe Colorado tin diferente cas cu ta wordo huur via Airbnb, y segun e asociacion famianan cu mucha cu ta bishita e area tin cu cana den e mesun espacio caminda vehiculo ta pasa pa bay Baby Beach. Residentenan ta bisa cu nan ya tin mas di cuater aña ta confronta zonido y stof relaciona cu e desaroyo, y cu e preocupacion awor a evoluciona te na algo mas fundamental: pa por sali for di cas y cana den bario sin corre riesgo di un accidente.

SECRETS A HACI CAMBIO

E asociacion si ta reconoce cu Secrets a haci cambionan. Segun e residentenan, e hotel a crea mas espacio riba su propio tereno na parti patras pa personal y trahadornan di construccion parkeer, y mayoria di nan awor ta haci uzo di e espacio ey. Pero algun vehiculo ainda ta keda parkeer canto di caminda na parti patras di hotel, cu como consecuencia turista tin cu cana riba caminda pa pasa. Pues, segun e residentenan, e cambio a yuda, pero e problema di seguridad no a desaparece.

UN SOLO CAMINDA SIGUI TA PREOCUPACION

Un di e preocupacionnan mas serio cu residentenan a menciona anteriormente ta cu Seroe Colorado tin practicamente un solo caminda principal pa trafico di entrada y salida. Esaki tabata tambe parti di nan keho na Noticiacla na juni. Awor nan ta pone un otro pregunta: kico lo pasa den un emergencia grandi? Segun e asociacion, e caminda ta carga diariamente cu vehiculo di personal di hotel, trahadornan di construccion, residentenan, turista, proveedor y otro trafico. Nan ta teme cu, den caso di un candela of otro emergencia serio na hotel of den bario, unidadnan di emergencia por haya dificultad pa yega of sali rapidamente door di congestie. Tambe e bocht despues di Kaminis den direccion di Anker ta wordo menciona como un punto peligroso, caminda, segun residentenan, incidente y situacion peligroso ta ocuri cu frecuencia.

KEHONAN DI JUNI AINDA RELEVANTE

Na juni, residentenan a presenta na Noticiacla un lista amplio di preocupacion tocante futuro di Seroe Colorado. Ademas di trafico y falta di sidewalk, nan a menciona cas abandona, falta di inversion den infrastructura, ruido, holo proveniente di cocina di hotel, problema cu presion di awa, futuro di Santana di Cacho, falta di un post permanente di polis y ausencia di un caminda alternativo di emergencia. E update actual ta mustra cu, por lo menos segun e residentenan, e problema di trafico no solamente no a desaparece, sino a bira mas urgente.

Pa nan, e pregunta ya no ta solamente con desarrollo turistico por coexistí cu un bario existente, sino con Gobierno, hotel y autoridadnan lo garantisa cu e hendenan cu ta biba na Seroe Colorado por sigui cana, sali for di nan garage y move den nan propio bario cu seguridad. NOTA; Potret ta uno ficticio pero relevante, cu unico meta pa dramatisa e situacion manera splica den e raportahe.