Mas di 7 mil tonelada exporta pa islanan ABC den 2026

CARACAS — Mas di 7 mil tonelada di producto a wordo exporta for di Venezuela pa Aruba, Boneiro y Corsou entre januari y mei di 2026, segun Camara di Comercio di La Vela de Coro.

Vicepresidente di e Camara, Juan Gotopo, a informa cu 7.046 tonelada a wordo exporta durante e prome cinco luna di e aña. Desde reapertura di e puerto na mei 2023 te cu mei 2026, exportacion total pa e islanan ABC a yega 34.661 tonelada di fruta y berdura.

Platano ta e producto mas exporta, cu 34% di e total, sigui pa coco cu 10%, patia cu 5%, avocado cu 4% y lechosa cu 3%.

Gotopo a indica tambe cu sector ta spera cu autoridadnan di Ministerio di Transporte di Venezuela reanuda inspeccion tecnico na Puerto di Muaco, cu ta deteriora desde 2017. Segun dje, bishitanan tecnico a para despues di e temblornan di juni y e expectativa ta cu trabou di recuperacion di e puerto por cuminsa pronto.