Aruba ainda ta goberna cu ley di ministerionan di 2022

ORANJESTAD — Mas di 500 dia despues cu gabinete AVP-FUTURO a drenta na poder, Aruba ainda no tin un Landsverordening Instelling Ministeries, LIM, nobo na vigor cu ta refleha e reparticion actual di carteranan ministerial. E ley oficial vigente ainda ta e LIM 2022, crea bou di e gabinete anterior. E punto a wordo treci dilanti e siman aki pa MEP den un comunicado politico, pero un verificacion di NoticiaCla ta mustra cu Gobierno atual sí a presenta un proyecto di LIM nobo. E proyecto a wordo entrega na Parlamento dia 18 november 2025 y a wordo trata posteriormente. Den februari 2026, sinembargo, Gobierno a dicidi pa no firma e ley despues cu Raad van Advies a conclui cu un amendamento agrega durante tratamento parlamentario tabata den conflicto cu un regla superior. Resultado: e LIM nobo no a drenta na vigor.

KICO TA UN LIM?

LIM ta abreviacion di Landsverordening Instelling Ministeries. Ta e ley cu ta establece cua ministerionan Aruba tin y cua asuntonan oficialmente ta cay bou di responsabilidad di cada minister.

E importancia di e LIM ta bay mucho mas leu cu solamente e nomber di e ministerio. Staatsregeling di Aruba ta establece cu ministerionan mester wordo institui mediante landsverordening y cu cada ministerio ta bou di direccion di un minister. E LIM, e ora, ta forma e base huridico pa defini ken ta responsabel pa kico den Gobierno.

E ley vigente di 2022 ta detaya e responsabilidadnan di ministerionan y establece incluso cu, si un minister ta trata un asunto cu legalmente ta pertenece na otro ministerio, e asunto mester wordo transferi na e minister corecto.

PAKICO E TA IMPORTANTE?

Un LIM actualisa ta importante pa responsabilidad, transparencia y control parlamentario. Si reparticion politico di carteranan ta cambia, pero e ley no ta sigui e cambio, por surgi diferencia entre ken den practica ta maneha un asunto y ken legalmente ta responsabel p’e. E preocupacion aki no ta nobo. Ya na mei 2025 fraccion di PPA a cuestiona Gobierno pasobra e distribucion di carteranan di gabinete AVP-FUTURO tabata diferente for di loke LIM 2022 ta establece. PPA a argumenta cu esaki por complica control di Parlamento y responsabilidad ministerial. Raad van Advies tambe a critica e manera cu Gobierno a propone reorganisa ministerionan den e proyecto nobo, particularmente combinacionnan di cartera cu, segun e organo asesor, no tabatin suficiente coherencia.

PRESUPUESTO Y LIM

E tema ta bira ainda mas relevante awor cu Presupuesto 2027 ta den Parlamento. Gobierno mes a enfatisa cu e presupuesto nobo mester conecta prioridadnan di maneho cu gasto publico y haci responsabilidad mas transparente. Pero mientras e LIM nobo no ta na vigor, e base legal general pa structura di ministerionan ta sigui e ley di 2022. Asina, e punto central no ta cu Gobierno nunca a presenta un LIM nobo. E pregunta mas preciso ta otro: pakico, mas di 500 dia despues di entrada di gabinete AVP-FUTURO, Aruba ainda no tin un LIM nobo vigente cu ta refleha e Gobierno cu actualmente ta gobernando?