Vacuna contra influenza 2026-2027 ta disponibel na Aruba

ORANJESTAD — Directie Volksgezondheid (DVG) ta informa cu e vacuna contra influenza pa temporada 2026-2027 a yega Aruba y ta disponibel pa personanan den grupo di risico, mientras otro persona tambe por cumpra e vacuna.

Segun DVG, influenza por causa complicacion serio y hospitalisacion, especialmente entre personanan vulnerabel. Vacunacion ta yuda reduci e riesgo di bira gravemente malo.

Entrante dialuna 14 di september, personanan cu ta pertenece na grupo di risico por haya e vacuna gratis na Seccion di Malesanan Infeccioso na Avicenastraat 1, entre 1:00 y 4:00 di atardi.

Entre e gruponan cu ta bin na remarca pa vacunacion gratis tin personanan di 60 aña of mas, personanan cu riesgo medico, muhernan na estado cu ta cumpli cu cierto criterio medico y trahadornan di cuido cu tin contacto directo cu pashent vulnerabel.

Personanan di 60 aña of mas mester trece nan carchi di AZV. Esnan bao 60 aña cu ta pertenece na un grupo di risico mester trece nan carchi di AZV y un recept di dokter di cas of specialista.

Esnan cu no ta pertenece na un grupo di risico, pero cu kier vacuna, por cumpra esaki pa Afl. 20 entre 1:30 y 3:30 di atardi. Mester presenta un ID valido y pago ta solamente via swipe.

DVG ta prepara tambe un programa di vacunacion den diferente bario. Fecha, horario y lugarnan di e bus di vacunacion lo wordo anuncia posteriormente.