Dowers: Tecnologia por fortalece frontera, pero tecnologia so no ta suficiente

ORANJESTAD — Aruba ta anfitrion durante dos dia di SITA Borders User Forum, un encuentro internacional cu ta reuni representantenan di gobierno y sector turistico for di Caribe y America Central pa intercambia conocimiento riba tecnologia moderno pa aviacion y control di frontera.

SITA, originalmente Société Internationale de Télécommunications Aéronautiques, ta un organisacion internacional lider den tecnologia di informacion y comunicacion pa sector di aviacion. Su solucionnan ta wordo usa pa aerolineanan, aeropuertonan y gobiernonan den areanan manera procesamiento di pasahero, identidad digital, biometria, intercambio di informacion y control di frontera.

Minister di Husticia Arthur Dowers a duna inicio na e forum na Embassy Suites Aruba y a enfatisa cu tecnologia moderno por fortalece siguridad y eficiencia na frontera, pero cu tecnologia so no ta suficiente. Segun e minister, personal prepara, cooperacion entre instancianan y intercambio efectivo di informacion ta igualmente importante.

E forum ta enfoca riba digitalisacion di proceso di biahe, identidad digital y biometria, procesamento di pasahero, intercambio di informacion y solucionnan pa haci operacion di aeropuerto y control di frontera mas rapido y sigur.

Pa Aruba, cu ta depende fuertemente di conectividad aereo y turismo, modernisacion di control di frontera ta di importancia strategico. Dowers a destaca cu e encuentro ta duna Aruba oportunidad pa intercambia experiencia cu partnernan internacional y conoce solucionnan cu por determina futuro di biahe y siguridad di frontera.