Croes: Lista ta revela urgencia na 43 scol: renovacion ta exigi Afl. 173,6 miyon

ORANJESTAD — Minister di Enseñansa Gerlien Croes diahuebs a publica un bista di e gastonan estima pa renoba 43 scol den diferente distrito di Aruba, riba su pagina di Facebook. E cifranan presenta ta mustra un situacion alarmante: practicamente tur caminda tin necesidad urgente, mientras segun Croes niun scol a haya un renovacion completo desde 2016.

E lista ta parti e scolnan den cinco distrito y ta menciona e siguiente subtotalnan:

* Noord/Tanki Leendert: 10 scol — Afl. 25.999.463,64

* Paradera/Ayo/Piedra Plat: 6 scol — Afl. 27.135.942,91

* Santa Cruz: 9 scol — Afl. 42.861.900,00

* Savaneta/Pos Chikito: 5 scol — Afl. 15.964.531,45

* Cura Cabai/Brazil/San Nicolas/Weg Fontein: 13 scol — Afl. 61.650.403,25

REACCION FUERTE 

Minister Croes a reacciona fuertemente riba e resultado y a critica politiconan cu anteriormente tabata responsabel pa enseñansa y infrastructura. “Overzicht oficial a drenta y cu esaki mi kier djis bisa cu algun politico mester djis keda keto den proximo añanan, paso unda boso tawata tur e añanan aki?” Croes a declara.

RENOBACION DESDE 2016

Segun e minister, desde 2016 niun scol a wordo renoba, apesar cu durante e periodo ey Aruba tabatin diferente minister di Enseñansa y tambe un ex-promer minister cu anteriormente tabata carga responsabilidad pa infrastructura.

Croes a indica cu Aruba tin aproximadamente Afl. 40 miyon pa aña pa inverti den tur necesidad di pais. E suma necesario solamente pa atende e scolnan ta varios biaha mas grandi cu e capacidad anual completo di inversion di Gobierno. “Shon nan, sorry, pero ta basta cu politica barata na e pais aki. Ken boso tin na pecho en realidad?” e minister a expresa. “Tur caminda ta un urgencia na e momento aki na nos scolnan. Echt no por”, e mandatario a sigui bisa. 

DIFERENCIA DEN E TOTAL

Un calculacion di e cinco subtotalnan publica ta resulta den un suma di Afl. 173.612.241,25. Sinembargo, e total final mustra den e overzicht ta Afl. 137.612.241,25. Esaki ta un diferencia di exactamente Afl. 36 miyon.

No ta cla ainda si esaki ta un fout di calculacion den e documento, si un di e subtotalnan no mester forma parti di e total general, of si tin otro splicacion. A base di e cifranan individual presenta pa distrito, e suma ta yega na Afl. 173,6 miyon.

Maske e total oficial ainda mester wordo clarifica, e lista ta confirma cu atraso den mantencion y renovacion di scolnan a crece te na un nivel cu Gobierno dificilmente por atende dentro di un solo aña presupuestario. E reto awor ta pa determina prioridad, identifica financiamiento y presenta un plan concreto cu fecha pa e scolnan cu tin e necesidad mas urgente.