Aruba ta explora ruta comercial nobo pa importa carni for di Republica Dominicana

ORANJESTAD — Minister di Finansa, Asuntonan Economico y Sector Primario, Geoffrey Wever, a inicia conbersacionnan na Santo Domingo pa explora un ruta comercial nobo entre Aruba y Republica Dominicana, cu importacion di carni como un di e prome oportunidadnan concreto.

Durante un reunion cu ProDominicana na HUB Camara Santo Domingo 2026, a papia riba con importadornan Arubano por cumpra carni di empresanan Dominicano aproba y certifica, cumpliendo cu tur rekisito sanitario y veterinario aplica na Aruba.

Un punto clave ta logistica. Pa e ruta por ta competitivo y sostenibel, mester tin suficiente volumen pa yena container regularmente. P’esey, Gobierno ta explora tambe participacion di mas importador y posibilidad di combina carni cu otro productonan Dominicano den e mesun fluho comercial.

Segun Wever, e meta no ta solamente haya un proveedor nobo, sino crea un ruta comercial cu ta practico, competitivo y continuo. E partidonan a papia tambe riba un posibel Memorandum of Understanding pa structura cooperacion y defini e siguiente pasonan.

Ainda no tin un acuerdo final pa importacion di carni. E proceso ta sigui cu contacto comercial, coordinacion tecnico y evaluacion di e condicionnan necesario pa diversifica fuentenan di abastecemento di Aruba y reduci dependencia riba un cantidad limita di mercado.