Huez a pone limite na Aduana: decision mester basa riba hecho concreto

ORANJESTAD — Dos sentencia di Corte di Prome Instancia ta aclara con un disputa entre importador y Aduana di Aruba mester wordo evalua: tanto e importador como Aduana mester sostene nan posicion cu dato concreto tocante e producto importa. Comparacion general, registracion of suposicion so no ta suficiente.

Den e prome caso, un piscador comercial a perde su reclamo pa exoneracion di derecho di importacion riba un boto Harris Cuttyhunk di 28 pia. Aunke e doño ta registra como piscador comercial y ta usa e boto pa su trabou, huez a determina cu esey no ta suficiente. Lo decisivo ta e caracteristicanan fisico y tecnico di e boto na momento di importacion.

Segun huez, e embarcacion no tabatin diferente ekipo tipico di pesca profesional, manera un dek di trabou funcional, equipo fijo pa hala red of liña, espacio pa warda of fria pisca y sistema hidraulico of mecanico pa pisca. P'esey, Aduana tabatin razon pa no clasifica e boto como embarcacion profesional di pesca.

Den un di dos caso, e mesun principio a traha contra Aduana. Un importador a cumpra un Harley-Davidson Road King di 2002 na Merca pa $3.200, pero Aduana a calcula e bealor na $6.000 basa principalmente riba prijsnan online di motornan comparabel.

E importador a presenta  contrato di compra, comprobante di pago, mensahenan cu e bendedor y un declaracion di e bendedor. Huez a conclui cu Aduana no a presenta prueba suficiente cu realmente a paga mas cu $3.200 y tampoco a investiga e condicion, kilometraje y historia di mantenemento di e motor.

Como resultado, e balor aduanero mester wordo pone bek na $3.200 y e derecho di importacion y otro cargonan mester wordo calcula di nobo. Aduana mester paga tambe Afl. 1.400 na gastonan di proceso y Afl. 25 na costo di corte.

E dos casonan ta mustra cu e regla ta conta pa tur dos banda: esun cu ta pidi un trato fiscal special mester proba cu e producto ta cumpli cu e condicionnan legal, y Aduana tambe mester presenta evidencia concreto ora e kier rechasa un balor declara. Fuente Aruba.nu