CAft: “Haci escogencia riba turismo awor cu presupuesto ta permiti esaki”

ORANJESTAD – Colegio Aruba supervision financiero (CAft) ta conseha Gobierno di Aruba pa haci un escogencia fundamental tocante futuro di turismo y incorpora e escogencia aki den presupuesto, e agenda di inversion pa varios aña y e reglanan fiscal. Economia di Aruba ta asina conecta cu turismo cu e escogencia aki ta toca tur minister. Turismo ta e motor principal di crecemento economico, pero na mes momento e riesgo mas grandi pa mantene finansa publico sostenibel.

SITUACION FINANCIERO Y ECONOMICO

Economicamente, Aruba ta sigui bay bon, aunke e crecemento ta bira mas modera despues di añanan di recuperacion fuerte di turismo. E debe di sector colectivo como porcentahe di producto interno bruto a baha considerablemente durante e ultimo añanan, te na 64 porciento na 2025. Tanto e resultado di operacion como e resultado financiero di Pais Aruba ta keda positivo. Aruba ta hopi vulnerabel pa golpe economico; na 2020, por ehempel, Aruba tabata entre e economianan mas afecta. E incertidumbre economico mundial y e envehecemento di poblacion ta representa riesgonan importante pa finansa publico.

TURISMO: MOTOR Y RIESGO

Turismo ta e motor principal di economia Arubiano caba pa hopi aña. Den e ultimo 20 aña, e actividad turistico casi a dobla. Un crecemento adicional den cantidad di turista ta topa cu limitacionnan cu ya ta wordo sinti. Tin un escasez structural di trahado, e sector di servicio basico manera awa y coriente ta na e limite di su capacidad, trafico ta aumenta y presion riba mercado di vivienda ta sigui crece. E problema principal no ta falta di plan, sino e ehecucion di e plannan. CAft ta enfatisa cu e espacio financiero actual ta ofrece e momento pa inverti y introduci reforma, precisamente awor cu e presion riba finansa publico ainda ta limita.

SCOGE UN DIRECCION

CAft ta subraya e importancia pa Aruba haci escogencia awor. Enfoca riba mas bishitante lo aumenta e presion di turismo riba e pais. En cambio, enfoca riba e valor cu cada bishitante ta aporta y diversifica economia por reduci e diferencia entre crecemento turistico y crecemento di bienestar di poblacion. Den e sentido aki, Tourism 3.0 ta un punto di salida valioso pa e discusion den comunidad.

Crea institucionnan nobo pa duna forma na maneho di turismo por stroba un maneho turistico efectivo. Crea fondonan nobo, financia cu cobronan destina pa un fin specifico, por causa cu gastonan di gobierno bira fragmenta.

Recientemente, Aruba a cuminsa regula alojamentonan pa estadia cortico. CAft ta reconoce e importancia di regulacion efectivo, control y hacimento cumpli cu e reglanan den e area aki, y ta aconseha pa sigui desaroya esaki.

Aruba ta explora, hunto cu Fondo Monetario Internacional (IMF), e reemplaso di BBO pa un sistema di impuesto riba valor agrega (btw). Introduccion di un sistema di btw ta contribui na amplia e base di cobro di impuesto pa inclui tambe e sector informal.