Polis kier controla arma sin sospecha previo den barionan di riesgo na Aruba

ORANJESTAD — Hefe di Polis Ramon Arnhem ta pidi un ley cu ta permiti polis registra persona pa arma, sin necesidad di sospecha previo, den areanan considera di riesgo. E peticion ta sigui despues di varios incidente di tiroteo na Aruba. Esaki segun e portal Aruba.nu

Segun Arnhem, Minister di Husticia Arthur Dowers ta trahando riba e regulacion aki, pero actualmente no tin base legal pa aplica e medida.

Mientrastanto, polis a intensifica patruyamento den barionan di riesgo, cu participacion di unidadnan special, team di arresto y polis cu cacho.

Arnhem ta confirma presencia di gruponan criminal rival, pero no por afirma ainda cu e tiroteonan reciente ta acto di vengansa.

E hefe di polis ta enfatisa cu, banda di accion policial, colaboracion cu scolnan y organisacionnan social ta esencial pa preveni criminalidad entre hobennan.