Gobierno y sector UTV/ATV ta forma comision mientras caso ta bay Corte

ORANJESTAD — Gobierno di Aruba y representantenan di sector UTV y ATV a continua nan dialogo dialuna den un ambiente constructivo, segun minister Rene Herdé. Como siguiente paso, ta trahando riba formacion di un comision ampliamente representa, cu mester conduci e dialogo di forma structura y busca solucionnan concreto.

Segun Herdé, Gobierno ta tene cuenta cu preocupacionnan tocante continuidad di companianan y empleo, y ta comparti informacion cu e sector durante e proceso. E combersacionnan ta continua mientras Gobierno ta spera tratamento di e caso den Corte diahuebs. E meta, segun e minister, ta un solucion responsable y balansa cu ta considera tanto e marco aplicabel como e realidad economico y laboral.