Curpa sin bida haya na costa di Bachelor Beach

SAN NICOLAS — Polis a inicia un investigacion despues cu dialuna mainta a haya curpa sin bida di un homber na costa di Bachelor Beach, pariba di Anker, den un estado avansa di descomposicion. Identidad di e persona ainda no ta conoci.

Central di Polis a ricibi e notificacion pa mas o menos 6:14 di mainta y a despacha un patruya di San Nicolas, hunto cu otro autoridadnan, pa e sitio. Na yegada, polis a confirma cu tabatin un curpa sin bida banda di costa.

Departamento Forensico, dokter forensico, Recherche, UMM (Unit Mensenhandel Mensensmokkel) y Slachtofferhulp a presenta na e sitio. Brandweer tambe a brinda asistencia na polis.

E caso ta bao investigacion.

Cuerpo Policial Aruba ta pidi cualkier persona cu tin informacion of cu a mira algo relevante pa yama Tipline di Polis na 11141. E yamada por wordo haci anonimamente.