Gobierno a laga 2.616 pregunta sin contesta den aña parlamentario 25-26

ORANJESTAD — Parlamento di Aruba a presenta miles di pregunta na Gobierno durante e zittingsjaar 2025-2026, pero mas cu mitar di nan tabata ainda sin contestacion na momento cu e periodo a termina.

Segun e overzicht oficial di Parlamento, miembronan di Staten a presenta 4.595 pregunta por escrito. Gobierno a contesta 1.979, mientras 2.616 a keda sin contesta. Esaki ta representa aproximadamente 57% di tur pregunta presenta.

E cifra ta pone e funcion di control di Parlamento den centro di atencion. Un pregunta parlamentario por toca gasto publico, salud, husticia, infrastructura, educacion of cualkier otro area di Gobierno. Si e contestacion no bin, e control parlamentario ta keda incompleto.

E parlamentario cu mas pregunta sin contesta tabata Edgard Vrolijk, cu 516. Evelyn Wever-Croes tabatin 495 sin contesta, Rocco Tjon 377, Hendrik Tevreden 211 y Dangui Oduber 164. Tur ta di partido MEP. 

Tin tambe casonan unda ningun pregunta di un miembro a haya contestacion. Muzaninn Tromp tin registra 221 pregunta presenta y 221 sin contesta. Carlos Bermudez a presenta 76 y tur 76 a keda sin contesta.

E documento tin un diferencia interno cu merece nota: e tabla di pregunta pa parlamentario ta registra 4.595 pregunta, 1.979 contesta y 2.616 sin contesta, mientras e siguiente tabla, cu ta parti pregunta pa ministerio, ta registra un total diferente di 4.596 pregunta, 1.810 contesta y 2.614 sin contesta.

Independientemente di e diferencia administrativo, tur dos tabla ta mustra e mesun problema: miles di pregunta parlamentario no a haya contestacion.

Cu Parlamento ta habri un zittingsjaar nobo, e reto no ta solamente pa parlamentario haci pregunta, sino tambe pa Gobierno contestanan na tempo.