Cuater parlamentario cu cero pregunta den un aña parlamentario

ORANJESTAD — Mientras Parlamento di Aruba ta prepara pa cuminsa un zittingsjaar nobo, e overzicht oficial di trabou parlamentario 2025-2026 ta revela un diferencia notable entre e 21 representante di pueblo: cuater miembro di Parlamento no a presenta ni un solo pregunta por escrito durante henter e aña parlamentario. Mientras esey no kier men cu nan no a traha, pero den boca di pueblo, e ta wordo intepreta si como cu e parlamentario a sinta eyden y no a traha, pasobra pa traha, mester a haci pregunta. E cuater miembronan ta Gino Goeloe di FUTURO, Clifford Heyliger di AVP, Stephany Sevinger di AVP y Mike de Meza di AVP. E registro oficial di Parlamento ta pone 0 pregunta presenta, 0 contesta y 0 sin contesta pa cada uno di nan. E cifra ta contrasta fuertemente cu otro parlamentario. Rocco Tjon a presenta 1.035 pregunta por escrito, Evelyn Wever-Croes 996 y Edgard Vrolijk 628. Hendrik Tevreden a presenta 367 y Dangui Oduber 259.

E pregunta por escrito ta uno di e instrumentonan formal cu un miembro di Parlamento tin pa controla Gobierno, solicita informacion y obliga un ministerio a duna cuenta di su maneho.

PARTICIPA DEN PARLAMENTO

Sinembargo, e hecho cu un miembro no a presenta pregunta por escrito no ta automaticamente nifica cu e persona no a participa den Parlamento. Miembronan por participa den debate, comision, reunion publico, presenta mocion of haci otro trabou parlamentario. E overzicht oficial aki ta midi especificamente preguntanan presenta por escrito.

Pero hustamente pasobra e instrumento ta forma parti importante di control parlamentario, e cifra cero ta relevante.

Mas ainda cu un zittingsjaar nobo ta cuminsa, e pregunta pa e cuater parlamentario lo ta si nan lo cambia e patronchi aki, y con nan lo demostra den e siguiente periodo cu nan ta usa tur instrumento disponibel pa representa y controla Gobierno.