Wever: Presupuesto 2027 entrega na tempo y cu surplus di Afl. 84,1 miyon

ORANJESTAD – Minister di Finansa Geoffrey Wever a informa cu Presupuesto 2027 a wordo entrega na Parlamento dentro di e termino legal y ta cumpli cu e normanan financiero stipula den ley.

E presupuesto ta proyecta un surplus di Afl. 84,1 miyon pa Pais Aruba, equivalente na 1% di PIB. Na nivel di sector colectivo, e surplus proyecta ta pasa Afl. 203 miyon, of 2,4% di PIB. CAft a evalua e ontwerp-begroting positivamente y a conclui cu e ta cumpli cu e normanan financiero.

Gobierno ta conta cu un crecemento economico nominal di 4,1% pa 2027, cu PIB proyecta na aproximadamente Afl. 8,4 mil miyon. Inversionnan ta wordo mira como e motor principal di crecemento.

E nivel di debe nacional na sector colectivo ta proyecta pa baha di 59% di PIB na 2026 pa 54% na 2027. Segun Wever, menos debe y menos gasto di interes ta crea mas espacio pa inversion y sosten pa comunidad.

Presupuesto 2027 ta inclui fondo pa pension y Reparatietoeslag y ta sostene prioridadnan manera poder di compra, emprendemento, diversificacion economico, agricultura, economia blauw, fintech, energia renovabel, industria creativo y revitalisacion di Oranjestad y San Nicolas.

Gobierno ta introduci tambe gradualmente policy-based budgeting, cu meta pa conecta gasto publico mas directamente cu prioridadnan y resultado concreto.

Segun Wever, disciplina financiero no ta un meta riba su mes, pero e fundeshi pa por sigui inverti den economia, bienestar y futuro di Aruba.