Un morto, dos polis herida y 34 detencion despues di tiroteo masivo na Hulanda

OVERASSELT – Un tiroteo mortal den e pueblo Overasselt, den provincia Gelderland na Hulanda, a laga un homber di 51 aña morto, dos polis herida y a resulta den detencion di 34 persona. Segun polis, e situacion den e area ainda no ta completamente sigur.

E incidente a pasa den madruga di dialuna pa diamars cerca di un cas na Ewijkseweg. Ora polis a yega despues di un aviso tocante un situacion sospechoso, nan a wordo confronta inmediatamente cu tiramento. E dos agentenan a wordo herida, pero actualmente nan ta fuera di peliger di bida.

Polis a detene 34 persona na diferente lugar, entre otro den un veld di maishi, cerca di stacion di Nijmegen y riba autopistanan A73 y A76. Tambe a confisca varios arma y vehiculo. E sospechosonan ta bin di Francia, Belgica, Algeria y Hulanda.

Ministerio Publico ta sospecha e personanan di envolvimento den asesinato, intento di asesinato y preparacion di un secuestro. E motibo exacto ainda no ta confirma, pero autoridadnan ta papia di un conflicto cu ta dura ya pa un tempo.

E evento a causa gran conmocion den Overasselt, un pueblo normalmente trankil. Parti di e area a keda cera y polis a pidi habitantenan keda paden, entre otro pasobra no por exclui cu ainda tin arma den e area.