Herdé: Mas di 60% di camindanan di Aruba ta den condicion malo

ORANJESTAD – Mas di 60% di camindanan di Aruba ta den condicion malo, mientras cu recuperacion di e red existente por rekeri alrededor di Afl. 355 miyon.

Minister René Herdé a presenta e cifranan durante entrevista cu Tito Laclé den Noticiacla LIVE, describiendo estado di infrastructura vial como un problema cu a acumula durante hopi aña.

Segun Herdé, Aruba tin solamente un cantidad limita di caminda cu ta den bon condicion, especialmente esnan cu a ricibi mantenemento continuo.

E minister a indica cu solamente pone placa disponibel no ta suficiente. Aruba tin capacidad limita di compania di asfaltacion y, aunke Gobierno ta dispone di mas fondo, no necesariamente tin capacidad pa ehecuta tur obra simultaneamente.

Segun su calculacion, alrededor di Afl. 25 te 30 miyon pa aña por ta un nivel mas realistico di ehecucion, dependiendo di capacidad di mercado.