Herdé: Cas di Afl. 300.000 ta fuera di alcance pa hopi famia

ORANJESTAD – Cu costo di construccion acercando Afl. 3.000 pa meter cuadra, un cas relativamente chikito di 100 meter cuadra por costa cerca di Afl. 300.000, un suma cu hopi famia na Aruba no por financia.

Minister René Herdé a toca e problema durante entrevista cu Tito Laclé den Noticiacla LIVE, indicando cu Gobierno ta tratando di adapta regla di terreno pa haci vivienda mas alcanzabel.

Entre e cambionan menciona tin parcelanan mas chikito y reduccion di e porcentahe minimo cu un persona ta obliga pa construi riba su terreno. Segun Herdé, esaki por permiti casnan di entre aproximadamente 60 y 80 meter cuadra.

Gobierno tambe ta papia cu banconan pa busca productonan hipotecario cu por haci financiamiento entre aproximadamente Afl. 175.000 y Afl. 200.000 mas alcanzabel pa famianan cu ingreso normal.

Herdé a indica cu e realidad di mercado ta obliga Aruba pa pensa den casnan mas chikito y mas practico.