Gobierno ta duna paso importante pa mehora cuido di salud mental

ORANJESTAD – Manera cu Noticiacla a raporta recientemente, Gobierno di Aruba a aproba otorgamento di tereno na Fundacion Salud Mental Respaldo pa, hunto cu Fundacion Mama Ties, construi un clinica moderno dedica na cuido di salud mental.

E proyecto tin como meta amplia capacidad local pa tratamiento, specialmente pa casonan mas severo, y reduci necesidad pa manda pacientnan pafo di Aruba, separa di nan famia y red di sosten.

Minister Rene Herdé a enfatisa cu e facilidad nobo no ta solamente un inversion den salud, pero tambe den dignidad y calidad di bida. E vision ta inclui tambe mas formacion profesional y fortalecemento di personal specialisa.

Gobierno ta considera colaboracion entre sector publico, sector priva y institucionnan di salud esencial pa crea un sistema mas moderno, sostenibel y accesibel.

“Nos mester crea e posibilidad pa un persona haya e cuido cu e mester aki mes na Aruba, cerca di su famia y su red di sosten,” Herdé a declara.