Cicilia: Proyecto AWE ta conecta hobennan cu oportunidad real

ORANJESTAD – Minister Wendrick Cicilia a presenta proyecto AWE, un iniciativa enfoca riba empodera hobennan entre 16 y 35 aña pa medio di educacion, desaroyo personal y preparacion profesional.

Bou di e lema “Siña AWE, lidera mañan”, e proyecto lo inicia cu un grupo di aproximadamente 10 te 15 hoben y lo ofrece workshopnan practico den areanan manera barberia, bartender, servicio na cliente, huña acrilico y aplicacion di lashes.

Ademas, participantenan lo haya sosten den emprendemento, educacion financiero, mentoria, coaching y orientacion profesional. E meta ta pa yuda nan drenta mercado laboral, continua nan estudio of eventualmente cuminsa nan propio negoshi.

Segun Cicilia, Gobierno no mester warda pa hobennan bin busca oportunidad, pero mester bay directamente den bario pa identifica talento y conecta nan cu opcionnan real pa crecemento.

“Nos hobennan tin balor. Nos mester busca nan y conecta nan cu oportunidadnan cu por yuda nan crece personal y profesionalmente,” e minister a expresa.