Pieters (PPA): “HOFA ta toca autonomia di Aruba, no solamente finansa”

ORANJESTAD – Lider di fraccion di PPA, Eduard Pieters, ta sostene cu Rijkswet HOFA no ta solamente un asunto di disciplina financiero y interes mas abou, pero tambe di autonomia y autoridad di Parlamento di Aruba.

Segun Pieters, PPA no ta contra supervision financiero ni cooperacion cu Hulanda. Su preocupacion ta si e construccion di HOFA ta respeta Statuto, Constitucion y posicion autonomo di Aruba dentro di Reino.

El ta referi na Articulonan 3, 38 y 55 di Statuto, y ta argumenta cu si Aruba ta entrega of modifica parti di su autoridad autonomo, esey mester pasa via e procedimiento constitucional correcto.

Pieters ta critica Gobierno AVP-FUTURO tambe pa a permiti e proceso avansa na nivel di Reino sin cu Parlamento haya un debate substancial prome.

“Supervision si, cooperacion si, disciplina financiero si. Pero no pasa riba Statuto, Constitucion, Parlamento y autonomia,” Pieters ta declara.

Segun e, Parlamento mester tin e prome palabra, pasobra decisionnan toma awe rond di HOFA por determina cuanto autoridad Aruba lo conserva den futuro.