Dangui Oduber (MEP) ta bati alarma riba situacion financiero di hospital

ORANJESTAD – Parlamentario Dangui Oduber (MEP) ta expresa preocupacion serio tocante e situacion financiero di Dr. Horacio E. Oduber Hospital (HOH) y ta critica e silencio di Minister di Salud Publico Wyatt Ras.

Segun Oduber, hospital ta enfrenta dificultad financiero cu ta afecta pago na provedornan y, segun informacion cu ta circula, den algun caso hasta entrega di medicamento. E parlamentario tambe ta señala problema mas amplio den cuido medico, incluyendo escasez di dokter di cas, listanan di espera mas largo y demora pa specialistanan.

Oduber ta exigi cu Minister Ras informa Parlamento y pueblo tocante e situacion real di hospital y presenta un plan concreto pa sector di salud.

E parlamentario tambe ta cuestiona dicon e proyecto di renovacion y construccion di hospital ainda no a wordo entrega oficialmente, apesar cu Parlamento a ricibi un invitacion pa esaki desde september 2025.