MEP: Contesta di Minister Croes ta laga preguntanan clave habri

ORANJESTAD  - Despues di nuebe luna, Minister (Gerlien) Croes a contesta por escrito preguntanan tocante su biahe cu jet priva pa Corsou riba 19 di november 2025, pero segun fraccion di MEP y parlamentario Evelyn Wever Croes, e contestanan ta laga varios asunto importante sin aclaracion.

E minister a confirma cu el a contribui solamente na e landing fee di e vuelo. Esaki a trece mas duda, considerando cu durante e ultimo lunanan su splicacion tocante e pago a varia.

E cuestion principal ta ken a paga e resto di e costonan, incluyendo combustibel, crew, handling y otro gastonan operacional. E minister ta argumenta cu e informacion ta parti di su bida priva. Sinembargo, segun documentacion menciona pa fraccion, e biahe a wordo clasifica como un dienstreis oficial.

E fraccion tambe ta señala cu e Gedragscode pa Ministernan ta exigi transparencia ora un tercer persona paga parti di un biahe oficial. Ademas, e Bezwaaradviescommissie LAR anteriormente a considera e bezwaar contra falta di contestacion gegrond.

Lider di fraccion Evelyn Wever-Croes ta exigi cu e minister entrega documentacion y aclara ken a paga e resto di e vuelo y bou ki condicion. Si no bin claridad, Parlamento ta considera sigui cu pasonan legal.