Aruba ta fortalece preparacion pa crisis cu apoyo den Reino

ORANJESTAD – Gobierno di Aruba ta sigui fortalece su preparacion pa eventual situacionnan di crisis cu apoyo di Hulanda y cooperacion dentro di Reino.

Prome Minister Mike Eman a ricibi un delegacion lidera pa John van der Zwan, cu a presenta resultado di e trabou haci durante e ultimo periodo pa mehora preparacion, coordinacion y capacidad di reaccion di Aruba.

E iniciativa a cuminsa durante un periodo di aumento di tension entre Venezuela y Merca, ora Gobierno a considera importante pa Aruba ta prepara pa diferente scenario. Riba peticion di Prome Minister Eman, Hulanda a brinda apoyo cu experiencia y conocemento adicional den maneho di crisis.

Durante su estadia, Van der Zwan a traha estrechamente cu CMO y diferente profesional local. Hunto cu Joke Vroegop y Johnson, un profesional Arubiano cu ta traha pa BZK, el a presenta e recomendacionnan cu a resulta for di e proceso.

Eman a enfatisa cu Aruba ya tin un bon reputacion pa su preparacion den situacionnan excepcional, pero cu e trabou no ta termina nunca.

“Nos por ta bon prepara, pero semper tin espacio pa mehora,” Eman a bisa. Segun dje, comunidad, institucionnan y profesionalnan mester entrena y prepara hunto pa evita sorpresa ora un crisis presenta.

E siguiente fase lo enfoca riba implementacion di e recomendacionnan y mas cooperacion entre e diferente partnernan, cu atencion special pa coordinacion, entrenamiento y reaccion rapido.