Corsou ta blankea Japan 4-0 y ta campeon internacional di Little League

WILLIAMSPORT – Corsou ta un paso for di gloria mundial. Pariba Little League a derota Japan 4-0 diasabra den e final internacional di Little League World Series 2026, cu un actuacion dominante di pitcher Jaymiëll Martina, kende a poncha 12 bateador japones.

Cu e victoria, Corsou a corona su mes campeon internacional y a sigura su luga den gran final mundial di Little League World Series na Williamsport, Pennsylvania.

Martina tabata e figura principal di e encuentro. For di prome inning e pitcher curazoleño a mustra control y poder, ponchando tres bateador japones y saliendo sin daño di un situacion peligroso cu Japan tabatin corredor na base.

Japan no a logra haya e contesta pa su lanzamentonan. Martina a sigui domina durante e siguiente inningnan, incluyendo un impresionante tercer inning caminda el a poncha tur tres bateador cu el a enfrenta.

Ofensivamente Corsou a kibra e partido den parti abou di tercer inning.

Jaymiel Antonia a yega base despues di un tercer strike cu a scapa, y poco despues un serie di bunts y erornan defensivo di Japan a habri porta pa Corsou anota tres careda.

Nathanael Jansen a pone e bala den wega cu un bunt y un error di pitcher Yunosuke Yabe a permiti Antonia anota e prome careda di partido.

Despues, Jordan Richards a bunt y un error di catcher Kei Kawanishi a permiti Jansen cruza home pa pone e marcador 2-0. Un siguiente error, e biaha di primera base Rui Tobata riba un bunt di Juriënsly De Windt, a permiti Richards anota e 3-0.

Japan a comete varios error den e tercer inning, algo cu Corsou a castiga inmediatamente.

Den cuarto inning Corsou a agrega un careda mas. Giendry Ryan a conecta un single y, despues di un sacrifice bunt di V-dien Ignacio Lindo, Jaymiëll Martina mes a conecta un doblete fuerte pa center field cu a manda Ryan home: 4-0.

E doblete no solamente a aumenta e bentaha, pero a completa un actuacion excepcional pa Martina, kende tabata controlando e partido tanto riba monticulo como cu bat.

Japan a logra pone algun corredor riba base durante e partido, pero cada biaha Corsou a encontra forma di sali for di problema.

Den di cinco inning Martina a poncha dos di e tres bateadornan y evita cualkier posibilidad di un remontada.

Den e ultimo inning Japan a logra pone Hiroto Yokote riba base despues cu el a wordo bati cu pitch, pero e relevo di Corsou a caba e trabou. Ryunosuke Maeda a bati un groundball pa shortstop Zha-djir Janga, cu a fuerza e out na segunda base pa sera e partido.

Resultado final: Corsou 4 – Japan 0.

E victoria ta corona Curaçao como campeon di e bracket internacional y ta manda Pariba Little League pa e gran final mundial, caminda nan lo enfrenta e campeon di Estados Unidos.

Pa Curaçao, e soño mundial ainda no a caba.

Despues di blankea un potencia di baseball manera Japan, solamente un partido mas ta separa e mucha hombernan di Pariba Little League di e titulo mas grandi di Little League Baseball.