Restauracion di edificio John G. Eman ta cuminsa cu plan pa oficina, vivienda y horeca

ORANJESTAD — Trabounan di restauracion di e historico edificio John G. Eman, anteriormente edificio di Aruba Bank na Caya G.F. Betico Croes, a cuminsa oficialmente dia 14 di october. Minister Geoffrey Wever, Prome Minister Mike Eman y representante di Stichting Monumentenfonds Aruba Petra Davis a marca e inicio.

E edificio lo wordo transforma den un espacio multifuncional cu oficina pa CBS y SER, un apartamento y un espacio pa horeca cu terasa, manteniendo su balor historico y arquitectonico.

E proyecto ta sigui un acuerdo di intencion firma na 2024 y entrega di e edificio na Monumentenfonds na 2025. E ta forma parti di e plannan pa revitalisa centro di Oranjestad.

“Revitalisacion di Oranjestad no ta solamente restaura edificionan. E ta trata di crea actividad economico, oportunidadnan nobo,” Wever a declara.

E comunicado no ta menciona costo total ni fecha di finalisacion.