Jossy Motors a celebra 68 aña y reconoce empleada cu 50 aña di servicio

ORANJESTAD – Jossy Motors N.V. a celebra 68 aña di trayectoria na Aruba, un momento special cu General Manager César Tromp a usa pa reflexiona riba historia, desaroyo y futuro di e compania, pero tambe pa pone enfasis riba e personanan cu durante decenianan a contribui na su consolidacion.

Durante su discurso, Tromp a destaca e recorrido largo di Jossy Motors y con e compania a adapta su actividadnan durante añanan, ampliando e marcanan y productonan cu e ta representa.

Un di e momentonan mas significativo tabata e reconocimiento di un di e empleadonan cu tin e trayectoria mas largo dentro di compania. Segun Tromp, e empleado aki ya tin 50 aña di servicio na Jossy Motors — practicamente tres cuart parti di e 68 aña cu compania ta existi na Aruba.

E reconocimiento a subraya e parti humano di historia di Jossy Motors: un trayectoria cu no ta consisti solamente di marca, vehiculo y actividad comercial, sino tambe di generacion di empleado cu a contribui na continuidad di e compania.

Un otro capitulo importante den e historia ta e relacion cu Honda. Tromp a recorda cu presencia di Honda dentro di Jossy Motors no a cuminsa cu auto, sino cu motocicleta. “E historia mas bunita ta cu na principio nos a cuminsa cu motocicleta,” Tromp a bisa.

Segun Tromp, 1998 a marca un siguiente paso importante, ora Jossy Motors a amplia su actividad cu Honda den segmento di auto.

“Nos cu Honda a cuminsa na 1998, ora nos a cuminsa cu e marca di auto,” el a splica. E relato di Tromp a mustra un compania cu durante 68 aña a pasa door di diferente etapa di cambio y expansion, manteniendo un presencia constante den mercado Arubano.

Awe, Honda ta forma un parti importante di actividadnan di Jossy Motors, mientras e compania ta sigui prepara pa e siguiente fase di su trayectoria.

Tromp a indica cu futuro lo depende di e trabou cu ta wordo haci awe, di e experiencia acumula durante añanan y di capacidad pa sigui adapta na un mercado cu ta cambia constantemente. “E futuro ta bin cu nos tambe,” el a expresa.

Cu su aniversario di 68 aña, Jossy Motors ta marca casi shete decada di presencia den comunidad comercial di Aruba. E reconocimiento di un empleado cu ya tin 50 aña di servicio ta simbolisa cu gran parti di e historia ey no a wordo construi solamente door di negoshi, sino tambe door di e personanan cu durante añanan a dedica nan trabou na e compania.