Encuesta Noticiacla: 66% contra HOFA, pero mayoria ta mira beneficio financiero

ORANJESTAD – E resultado actual di encuesta di Noticiacla riba e ley di HOFA,  ta mustra un rechazo cla di HOFA den su forma actual. Di 648 persona cu a contesta e pregunta principal, 66,2% ta contra introduccion di e ley, 26,4% ta pro y 7,4% ainda no tin opinion of no sa suficiente riba HOFA.

REFERENDUM?

E mesun proporcion ta aparece ora ta puntra con nan lo vota den un referendum: 66,1% lo rechasa HOFA, 27,2% lo acepta y 6,7% ainda no sa. Ademas, 74,2% ta considera cu pueblo mester haya oportunidad di dicidi riba HOFA den un referendum.

APROBACION PARLAMENTO?

Tocante aprobacion parlamentario, 55,3% no kier pa Parlamento aproba HOFA. Un 27,3% ta pro aprobacion, mientras cu 14,9% lo acepta solamente si cierto condicionnan wordo cambia.

AUTONOMIA DEN WEGA

Autonomia ta forma e nucleo di e resistencia. Mas cu mitar, 53,1%, ta mira HOFA principalmente como un limitacion di autonomia, compara cu 26,3% cu ta mira e ley como proteccion pa finansa publico. Ademas, 71,5% ta por lo menos algo preocupa cu HOFA por duna Hulanda demasiado poder riba decisionnan financiero di Aruba.

PRO DISCIPLINA FINANCIERO 

Sinembargo, e resultado no ta representa un rechazo di disciplina financiero. Un 54% ta kere cu HOFA por of probablemente por preveni gobiernonan futuro di gasta mas cu Aruba por permiti. Tambe 55,7% ta considera obligacion pa mantene surplus y baha debe nacional como algo positivo.

SUPERVISION EXTERNO 

Riba supervision externo, solamente 32,1% ta rechasa esaki completamente. Un total di 67,3% ta acepta algun forma di supervision: directamente, temporalmente of solamente si situacion financiero deteriora. Tambe 65,6% tin confianza cu Gobierno di Aruba por mantene disciplina financiero, pero mayoria di e grupo aki ta exigi reglanan estricto.

FALTA INFORMACION RIBA HOFA 

Un otro señal fuerte ta falta di informacion. Segun 66% di participantenan, Gobierno y Parlamento no a informa pueblo suficientemente. Curiosamente, 64,5% ta bisa cu nan mes ta comprende HOFA bon of hopi bon.

DISCLAIMER 

E encuesta a registra 649 participacion, cu entre 625 y 648 contesta pa pregunta. E muestra ta domina pa personanan di 55 aña of mas y pa hombernan. Como encuesta habri y boluntario entre lector y s sigidornan di noticiacla, e resultado no mester wordo presenta como un peiling cientificamente representativo di henter Aruba.

E lectura principal ta cu e participantenan no ta rechasa disciplina financiero. Nan ta rechasa un modelo cu, den nan percepcion, por limita autonomia di Aruba y duna Hulanda demasiado influencia. E demanda ta pa regla financiero cla, mas informacion y participacion directo di pueblo.