Wever ta busca solucion pa awa, tereno y energia den sector primario

ORANJESTAD – Minister Geoffrey Wever a reuni cu UFA, CPCA, DLVV y Stichting Hadicurari pa trata e retonan den agricultura, cria di bestia y pesca.

Entre e problemanan menciona ta costo y disponibilidad di awa, falta di tereno agricola, daño causa pa cachonan los, prijs halto di energia, incertidumbre fiscal, pesticida y obstaculonan na importacion.

Gobierno ta trahando riba un proyecto piloto pa guia awa recicla pa dam di Santa Rosa. Tambe ta explora un parke agricola cu tereno, infrastructura y facilidadnan basico. E problema di cachonan los lo wordo evalua dentro di e cuadro legal, mientras cu costo di energia lo wordo discuti cu WEB.

Wever a confirma cu e exoneracionnan fiscal existente pa empresarionan agricola lo keda vigente.

“Nos mester determina ken ta responsabel pa cada reto y ki ora e sector por spera contesta,” Wever a declara. E minister lo sigui reuni periodicamente cu e organisacionnan pa monitorea progreso.