Vd Burg: Cambionan riba HOFA ainda no ta cla; lo por tin contesta na september

ORANJESTAD – Aruba y Hulanda ta preparando un contesta conhunto riba e conseho di Raad van State tocante e ley di HOFA. Segun Secretario di Estado Hulandes Eric van der Burg, e documento, conoci como ‘nader rapport’, probablemente lo ta cla otro luna, esta na september.

HULANDA TA LIMITA METEMENTO DI RIJKSMINISTERRAAD?

Noticiacla a puntra Van der Burg diabierna si Hulanda ta cla pa limita aprobacion di Rijksministerraad na e normanan financiero concreto den Lwho, manera Raad van State a recomenda pa proteha autonomia di Aruba. Tambe a wordo puntra kico concretamente lo cambia pa Aruba si e consejo wordo adopta, y si e enfasis riba autonomia no ta confirma parcialmente e critica cu e version original di HOFA tabata duna Den Haag demasiado control.

REACCION DI VD BURG 

Van der Burg no a contesta e preguntanan principal directamente. El a declara: “Actualmente Aruba y Hulanda ta trahando riba un reaccion conhunto riba e conseho. E ‘nader rapport’ probablemente lo ta cla na september. Den dje lo wordo splica con e paisnan ta pensa di trata e consejo di Raad van State.”  Pues, ainda no ta cla si HOFA lo wordo adapta y cuanto control Rijksministerraad finalmente lo conserva.