Maduro(MEP): Mas cu Afl. 105 miyon na inversion no a wordo ehecuta

ORANJESTAD - Parlamentario Xiomara Maduro di MEP ta cuestiona declaracion di Minister Gerlien Croes cu Aruba mester di HOFA pa haya placa pa inversion. Segun Maduro, cifranan oficial ta mustra cu e problema principal no ta falta di placa presupuesta, sino falta di capacidad pa prepara y ehecuta proyectonan.

E rapportnan di ehecucion ta mustra cu Gobierno a realisa 83,9% di Afl. 51,6 miyon presupuesta na 2023. Na 2024 solamente Afl. 13,8 miyon di Afl. 66,1 miyon a wordo realisa, mientras cu na 2025 e ehecucion tabata Afl. 30 miyon di un presupuesto di Afl. 74,5 miyon.

Entre 2023 y 2025, Gobierno a presupuesto Afl. 192,2 miyon pa inversion, pero solamente Afl. 87,1 miyon a wordo realisa. Esaki ta nifica cu mas cu Afl. 105 miyon a keda sin ehecuta.

Maduro ta reconoce cu HOFA por facilita financiamento, pero ta adverti cu mas prestamo no automaticamente ta resulta den mas inversion. Sin suficiente planificacion y capacidad administrativo, e por simplemente crea mas debe pa Pueblo paga.

“HOFA no por drecha falta di ehecucion. Bon gobernacion, capacidad administrativo, transparencia y responsabilidad si por,” Maduro a conclui.