Wever: Resultado positivo di casi Afl. 260 miyon den prome mitar di 2026

ORANJESTAD – Gobierno di Aruba a registra un resultado financiero preliminario positivo di casi Afl. 260 miyon durante e prome seis lunanan di 2026. Segun Minister di Finansa Geoffrey Wever, e resultado ta consecuencia di mas entrada, gasto bou control y un economia cu ta sigui desaroya positivamente.

Te cu 30 di juni, Gobierno a ricibi Afl. 1,119 biyon na entrada, equivalente na 56,6 porciento di e entrada presupuesta pa henter 2026. Gastonan tabata alrededor di Afl. 860 miyon, of 46,3 porciento di e presupuesto anual.

Entradanan di impuesto directo y indirecto destina pa Pais Aruba a yega Afl. 918 miyon, un aumento di 7 porciento compara cu e prome mitar di 2025. Entrada di BBO/BAVP a subi cu 8 porciento pa Afl. 232 miyon, mientras cu toeristenheffing a aumenta cu 18 porciento pa Afl. 63,1 miyon.

Gobierno tambe a ricibi Afl. 252,4 miyon na winstbelasting, e nivel mas halto registra durante e prome dos kwartaalnan entre 2019 y 2026. Segun Wever, e cifra ta confirma un desaroyo positivo den actividad empresarial y economia di Aruba.

“Nos obhetivo no ta solamente pa presenta bon cifra. Nos ta trahando pa crea un base financiero solido cu ta permiti Gobierno cumpli cu su obligacionnan, baha debe, proteha poder di compra y crea espacio pa sigui inverti den comunidad,” Wever a declara.

Durante e prome mitar di aña, Aruba a paga aproximadamente Afl. 345 miyon na debe. Na fin di juni, debe total di Pais Aruba tabata Afl. 5,022 biyon, equivalente na 62,2 porciento di PIB. Esaki ta mas abou cu e 65,9 porciento registra den e di dos kwartaal di 2025.

Gastonan di personal ta wordo proyecta na 8,2 porciento di PIB pa fin di 2026, ampliamente bou di e norma maximo di 10 porciento stipula den LAft.

Gobierno a mantene e resultado positivo apesar di medidanan manera e aumento di Afl. 150 pa luna den reparatietoeslag pa pensionadonan y reduccion temporal di accijns riba gasolin y diesel pa limita presion riba costo di bida.

Wever a adverti cu e resultado positivo no ta motibo pa perde disciplina. “Aruba ainda tin un debe significativo y nos economia ta sensitivo pa desaroyonan internacional. Pesey nos lo sigui baha debe, mantene gasto bou control y usa e espacio cu nos crea pa fortalece poder di compra, economia y futuro di Aruba.”