VNO y RAPP ta honra prensa y destaca importancia di periodismo liber

ORANJESTAD – Representacion Hulandes na Aruba (VNO) y organisacion di prensa RAPP a celebra Dia di Prensa hunto cu un grupo selecto di miembronan di prensa, diahuebs atardi na oficina di VNO.

Representante Hulandes Vincent Storimans y presidente di RAPP, Melissa Stamper, a duna e palabranan di bon bini. Despues di un presentacion cortico di empleadonan di VNO y e periodistanan presente, e encuentro a sigui den un ambiente informal y agradabel.

Storimans a destaca e rol esencial cu periodista ta cumpli den un estado democratico di derecho. “Un estado democratico di derecho por funciona solamente cu un prensa liber, independiente y critico,” Storimans a declara.

Segun e, poder—sea den Gobierno of sector empresarial—mester wordo controla y cuestiona. “Poder mester wordo controla. E ta importante cu e poder ey wordo cuestiona. Esey ta loke boso ta haci,” el a bisa na e periodistanan presente.

Storimans a agrega cu e control aki mester tuma luga na un forma profesional. Den e sentido ey, el a elogia fundacion di RAPP dos aña pasa como un desaroyo positivo pa uni e periodistanan di Aruba y contribui na profesionalisacion di prensa mediante training, seminario y otro actividad.  “Nos ta aki pa sostene boso y pa expresa nos aprecio pa e trabou importante di prensa,” Storimans a remarca.

El a confirma cu VNO y Ministerio Hulandes di Asuntonan Interno y Relacionnan den Reino ta sostene e esfuerzonan di RAPP y ya a contribui na diferente evento, seminario y conferencia.

RAPP TA PREPARA ACTIVIDADNAN RIBA AI

Presidente di RAPP, Melissa Stamper, a gradici VNO pa e celebracion y pa e sosten cu e organisacion a ricibi desde su fundacion. “Na prome luga, mi kier bisa danki na VNO pa organisa esaki hunto cu RAPP y tambe pa e sosten desde e momento cu nos a lansa na 2024,” Stamper a bisa.

Segun e presidente, fundacion di RAPP tabata importante pa conecta e periodistanan, pero tambe pa fortalece e sector na nivel profesional. “Esaki tabata importante pa nos, no solamente den parti social, pero tambe profesional, pa organisa nos mes como profesionalnan den area di prensa,” el a splica.

Stamper tambe a anuncia cu dia 25 di september RAPP lo organisa un seminario gratis pa periodista bou di tema “AI Innovations”. Dia 26 y 27 di september lo sigui un fin di siman completo cu workshop practico. “Nos lo tin oradornan internacional. Un orador for di Puerto Rico lo papia tocante AI y etica, un orador for di Hulanda lo papia tocante vibe coding den newsroom, y un experto local lo papia tocante uso di prompting pa periodista,” Stamper a anuncia.

E workshopnan lo trata AI Essentials y aplicacion practico di vibe coding. E encuentro a termina cu un brindis y un momento di intercambio entre e periodistanan y representantenan di VNO. Cu e actividad, VNO y RAPP a expresa nan aprecio pa e trabou importante cu prensa ta realisa diariamente na Aruba.