Merca cerca di acuerdo pa acceso na 90 biyon baril di petroleo Venezolano

WASHINGTON/CARACAS – Merca y Venezuela ta negociando un acuerdo cu por duna empresanan Mericano acceso di largo plaso na 17 campo petrolero Venezolano, cu hunto tin aproximadamente 90 biyon baril di reserva comproba.

Segun Axios, Bloomberg y Reuters, Washington kier obtene un participacion directo den e camponan. Un di e posibilidadnan ta un sistema di lease, cu por inclui contratonan di te 100 aña. E petroleo produci lo ta disponibel pa entrega na Merca.

E negociacionnan ta inclui campo ainda no desaroya den Faha di Orinoco y zonanan bieu rond Lago di Maracaibo. Venezuela tin aproximadamente 300 biyon baril di reserva comproba, e cantidad mas grandi na mundo, pero actualmente ta produci solamente alrededor di 1,25 miyon baril pa dia.

Un acuerdo asina por enfrenta obstaculo legal, pasobra constitucion Venezolano ta reserva e actividadnan principal di industria petrolero pa e Estado. Cambio reciente den ley si ta permiti un joint venture y acuerdo di produccion cu empresa stranhero.

E plan ta cuadra cu intencion di Presidente Donald Trump pa reduci dependencia energetico di otro region, especialmente cu guerra na Iran y disturbio riba mercado mundial di petroleo.

Sinembargo, ainda no tin un acuerdo definitivo. E condicionnan por cambia y no ta conoci ainda ki ora e dos paisnan por firma un trato.