Rey Harald di Noruega a muri cu 89 aña; Haakon VIII ta sigui’e

OSLO – Rey Harald V di Noruega a muri diabierna mainta na edad di 89 aña. Segun Palacio Real, e monarca a fayece trankilamente pa 6.35’or den Hospital Nacional na Oslo, despues di varios problema di salud.

Harald tabata rey desde 1991 y tabata e mandatario real mas grandi den edad na Europa. Durante su reinado, el a bira un figura sumamente popular, conoci pa su cercania cu pueblo y su compromiso social.

Den ultimo simannan, su condicion a empeora despues di complicacion causa pa anemia y un infeccion den sanger. Miembronan di su famia a bishit’e durante su ultimo dianan.

Su yiu di 53 aña a sigui’e como Rey Haakon VIII. Haakon ya tabata actuando como regente durante ausencia di su tata. Un reunion special di Conseho di Minister ta marca e transicion oficialmente.

Promer Minister Jonas Gahr Støre a honra Harald como un rey cu tabatin “confianza inamovibel den pueblo Noruego” y cu a dedica su bida na su pais. Medionan Noruego ta describi su morto como fin di un epoca.

Rey Willem-Alexander, Reina Máxima y Princesa Beatrix di Hulanda tambe a expresa nan profundo tristeza. Den nan mensahe, nan a elogia Harald pa e amor, orguyo y conviccion cu cual el a sirbi Noruega, finalisando cu e palabranan: “Takk for alt” — danki pa tur cos.