Noticiacla LIVE ta bolbe awe nochi cu minister Geoffrey Wever como invitado

ORANJESTAD – Noticiacla LIVE ta bolbe awe nochi cu inicio di un temporada nobo, y como prome invitado Minister di Finansa, Economia y Sector Primario, Geoffrey Wever.

Den e entrevista, Noticiacla lo toca algun di e temanan cu actualmente ta domina debate economico y politico na Aruba. Entre otro, lo papia tocante e resultado positivo di finansa publico y e pregunta con pueblo por sinti mas directamente e beneficio di esaki, specialmente den un momento cu costo di bida ta sigui pisa riba hopi famia.

Tambe lo bin riba mesa HOFA, e discusion tocante futuro financiero di Aruba y importancia di e tema aki dentro di coalicion. Otro asunto ta e preocupacion di empresario y inversionista tocante atraso den proceso gubernamental y si burocracia ta stroba crecimiento economico.

E programa lo busca contesta concreto for di e minister, pero sin perde di bista e pregunta principal: con e cifranan positivo y plan economico di Gobierno lo traduci den resultado cu ciudadano por realmente sinti?

Noticiacla LIVE ta marca cu esaki regreso di e programa cu un temporada nobo di entrevista cu figura clave den politica y comunidad Arubano.