A.T.A. y APA ta laga 60 mucha conoce mundo di crucero durante evento Buki di Pret

ORANJESTAD - Aruba Tourism Authority (A.T.A.) y Aruba Ports Authority N.V. (APA) a organisa otro edicion special di Buki di Pret abordo di e crucero Carnival Horizon, unda mas cu 60 mucha entre 8 y 14 aña a participa den un dia di educacion, inspiracion y diversion.

Durante e actividad, e muchanan a haña un vista di cerca di con industria di crucero ta opera y con turismo ta contribui na desaroyo economico di Aruba. Nan a participa den un recorrido abordo y diferente actividadnan recreativo y educativo.

Un punto importante di e bishita tabata e encuentro cu ehecutivonan clave di Carnival Cruise Line, incluyendo Marie McKenzie, Sarah Beth Reno y captain Rocco Lubrano. E delegacion oficial di Aruba, encabeza pa minister Wendrick Cicilia y ehecutivonan di A.T.A. y APA, a reuni cu nan tambe, subrayando e relacion continuo entre Aruba y Carnival Cruise Line.

Durante e ocasion, A.T.A. a presenta un plakkaat conmemorativo na APA pa su aniversario di 45 aña, reconociendo su aporte na desaroyo di Aruba como destinacion di crucero.