Prins Harry y Meghan lo bolbe biba na Reino Uni

LOS ANGELES - Media Britanico ta raporta cu prins Harry y su casa Meghan ta planea pa muda for di Estados Unidos bolbe Reino Uni mas laat e luna aki. E pareha lo biba cu nan dos yiu, prins Archie di 7 aña y prinses Lilibet di 5 aña, den un cas pafor di London.

Segun BBC, e muchanan lo cuminsa scol na Reino Uni luna proximo. The Daily Telegraph ta indica cu Harry y Meghan actualmente no tin plan pa bolbe asumi trabou oficial pa Cas Real.

Rey Charles a wordo informa di e decision durante ultimo fin di siman, y prins William y Kate tambe sa di e mudansa. Harry y Meghan mes ainda no a confirma e noticia oficialmente.

E pareha a muda pa California na 2020 despues di laga nan rol como miembro activo di cas real Britanico. Relacion entre Harry y su famia a bira tenso durante e añanan siguiente, specialmente cu prins William y, durante un periodo, tambe cu su tata.

Luna pasa Harry y Meghan a haci un bishita poco comun cerca RFey Charles y Reina Camilla. Tabata prome biaha den mas cu cuatro aña cu Charles a mira su nietonan personalmente.