CUA: Falta di contesta di DOW ta frena comercio y ta presiona infrastructura

ORANJESTAD – Presidente di Comerciantenan Uni di Aruba (CUA), Frans Ponson diamars mainta a expresa un critica fuerte riba funcionamiento di Departamento di Obras Publicas (DOW) y, mas ampliamente, riba e manera cu Gobierno ta atendiendo e asunto di infrastructura, permiso y peticionnan di comerciante y ciudadano. Segun Ponson, no ta trata di un problema nobo ni di un solo Gobierno, sino di un situacion “structural” cu ta dura pa añanan sin un solucion sostenibel.

KEHO DI MIEMBRONAN DI CUA

Durante e conferencia di prensa, Ponson a señala cu CUA ta ricibi kehonan di miembro cu ta warda un aña, un aña y mei of incluso mas pa un contesta riba nan solicitudnan. “No por ta posible cu un comerciante ta entrega algo y despues di mas cu un aña no por haya ni un contesta. Splica mi con nos ta bay maneha un pais asina.” Ponson ta cuminsa bisa. 

FALTA DI CLARIDAD 

Segun e presidente di CUA, e problema no ta solamente e tardansa mes, sino e falta di claridad. Un empresario cu kier inverti, haci un prestamo of habri un negoshi mester sa si su proyecto ta factibel y dentro di ki periodo e por spera un decision. “Duna hende un contesta. Si ta no, bisa no. Si ta si, bisa ki ora. Pero no laga un hende inverti placa y contrae debe riba un promesa mientras e permiso nunca ta sali.” Ponson a sigui bisa. 

Ponson a bisa cu e incertidumbre por kibra gana di hende cu kier haci negoshi incluso prome cu nan negoshi por habri. Segun e, esaki ta contrario na e discurso cu Aruba kier stimula comercio y diversificacion economico.  CUA ta sostene cu responsabilidad final pa busca solucion ta cerca Gobierno y e minister responsable. Ponson a reconoce cu DOW por tin limitacion di personal of recurso, pero a indica cu esaki no por bira un excusa permanente pa no atende peticionnan. “Si tin un problema, nos tin cu handle e. Den sector priva, si algo no ta funciona, bo ta busca un solucion. Gobierno mester haci mescos.”

CAMINDANAN TAMBE BOU DI CRITICA

Ponson a amplia su critica pa inclui condicion di camindanan na Aruba. Segun e, tin un contraste grandi entre e imagen di Aruba como un destinacion di “cinco streya” y e estado di parti di infrastructura vial. El a menciona e camindanan principal den y rond di area hotelero como ehempel, y a señala cu automobilistanan ta confronta buraco y parti di caminda den mal estado mientras Aruba ta cobra belasting riba miles di vehiculo cada aña. “Nos ta bende Aruba cinco estrella, pero ora turista sali for di hotel, casi e mester cuminsa busca shock absorber nobo pa auto.” Ponson a cuestiona unda e recurso di belasting di vehiculo ta bay y cuanto asfalt realmente a wordo pone durante e ultimo añanan. Segun e, Gobierno mester ta mas cla cu pueblo tocante cua caminda por wordo drecha, ki ora y cu ki presupuesto.

El a menciona tambe camindanan cu ta keda cera pa periodo largo sin solucion, incluyendo un situacion cerca un scol unda, segun e, accidente ta sigui pasa regularmente. “Nos no por warda te dia cu algo grave pasa cerca un scol pa despues cuminsa actua. Si un caminda ta peligroso y ta cera pa dos aña, pueblo tin derecho di sa ki ta e plan.”

CUA TA PIDI UN PLAN CU PLAZO

Pa CUA, un di e solucionnan ta pa Gobierno publica un plan concreto cu plazo pa trata solicitudnan. Ponson a sugeri cu si DOW of otro departamento no por responde inmediatamente, por lo menos mester tin un sistema unda ciudadano y comerciante sa dentro di cuanto luna nan lo haya un decision. “Nos mester tin claridad. No ta bisa tur hende ‘awe’, pasobra e sistema ta bao di presion. Pero bisa: dentro di seis luna bo ta haya un contesta. Algo concreto cu pueblo por confia.” Ponson a enfatisa cu e preocupacion no ta solamente di comerciante, sino di comunidad completo, pasobra e ciudadano comun tambe ta confronta e mesun tardansa ora nan entrega carta of solicitud na Gobierno. Segun CUA, e tema mester bira un prioridad politico, no solamente pa protega comercio y inversion, sino tambe pa aumenta confianza den aparato publico. “Nos no por sigui cu historia y promesa. Pueblo mester por confia cu ora Gobierno bisa algo, tin un plan, un fecha y un contesta.”

SALI AFO CU SPLICACION 

CUA ta pidi pa Gobierno y e minister responsable di DOW sali publicamente cu un splicacion riba e situacion actual, e capacidad di departamento y e medidanan cu lo wordo tuma pa reduci atraso den permiso, peticion y mantenimento di infrastructura.